الأم المصرية

القلق والتوتر عند الأم المصرية يبدأ من لحظة ما بتعرف انها حامل

اه والله زي ما بقولك كده متستغربش هتقولي وايه اللي يقلق يا عم دي حامل وحتبقي ام والمفروض تفرح جيلها نونه اقولك غلبان وعلى باب الله ومتفهمش حاجة الستات دول عاملين زي الشفرة اللي محتاجة تتفك عشان تفهمهم حاجة كده زي النقوش الفرعونية محتاج كتالوج او دماغ كائن فضائي عشان توصل لأول ليفل عندهم.

حاجة كده شاكب راكب هتاخد منك نص عمرك عشان تفهمها وفي الاخر بردو مش حتفهمهم ولا حتاكل معاهم عيش من الاخر الأمهات المصرية دول في ملكوت تاني دماغهم كلها نازله نفس السيستم نفس التركيبة كلهم ستاندرد واحد واوعي تنكر حتقولي بس يا عم حيلك حيلك دول غلبانين وانت ظالمهم اقولك اسمع الأول.

القلق يبدأ عند الأم المصرية من لحظة ما بتعرف انها حامل تفضل مرعوبة

الواد مبيتحركش في بطني ليه لا يكون جراله حاجة لا تكون المية قليلة وهاتك يا هبد من النوع ده ولو محملتش تقولك يا لهوي انا متجوزة بقالي اسبوعين ولسه محملتش.

مع ان بت خالتي حملت بعد اسبوع خير يارب لايكون فيه حاجة لا وديني للدكتور فانتا الوقت ده اوعي تفكر في اي رد غير حاضر نروح للدكتور طبعا الدكتور رده بيكون لسه بدري انتي مكملتيش شهر يا مدام مستعجلة على ايه طبعا الرد مش حيجي على مزاجها وحتقولك الدكتور ده مش فاهم حاجة وهاتك يا تحاليل واشاعات ومرار ووجع قلب لحد ما الحمد لله المدام تحمل طبعا انت مفكر انك كده ارتحت وانها حتسكت مش بقولك غلبان ده القصة لسه حتبتدي يا معلم.

دايما تقولك الواد مش راضي ياكل معرفش ليه مش حيرضا ياكل ليه يا امي مضرب عن الاكل مثلا ده طفل ومعدته صغيره
شوية وتشتكي انه مش بينام تفتكري مش حينام ليه شايل هم ايه ولو ربنا كرم ونام تقولك الولا ده بينام كتير وتقيس حرارته وتسمع نبضه وتكلم الدكتور تهريه اسئلة وهبد الي ملا نهايه كتير.

البيبي وعمايله

لحظه ما بتنيم البيبي لحظة تاريخية لو جدع اعمل صوت ولا اتحرك من مكانك تليفونك صامت اكتم أنفاسك وافضل علي وضعك كده.

البيبي كبر شوية والحمد لله ابتدي يحبي خد بقا شوية احتمالات عنب زي انا خايفة ياكل حاجة من الارض ولا يبلع حاجة ولا يحط صوابعه في فيشة الكهربا ولا حاجة تقع عليه ولو تأخر في المشي ولا في الكلام هو مبيمشيش ليه مش بيتكلم ليه يا حبيبي يا ابني انت محسود أصل جارتنا اللي في السابع شافته وهو بيرضع طب تفتكري حتحسده ليه ده بيرضع لبن مش بياكل خروف.

تابع الفيديو علشان تشوف الحاجات التانية

بس رغم كل اللي قولناه  ده ملناش غيرهم ولا نقدر نستغني عنهم ومن غيرهم منسواش حاجة  ربنا يخلي كل ام تعبت وسهرت وربت وكبرت ويبارك في 

عمرها ويجازيهم عنا كل الخير ويرحم كل ام اتوفت وسابت لعيالها ذكريات جميله لسه عايشين عليها لحد دلوقتي

 وكل سنة وكل ام طيبة وبخير كل سنه وامهاتنا احلي واغلي حاجه في حياتنا